नाशिक: नाशिकच्या काठेगल्लीमध्ये असलेली अनधिकृत दर्गा हटवण्यापूर्वी मंगळवारी मध्यरात्री जोरदार दंगा झाला होता. ही दर्गा हटवण्याआधीच नाशिकमध्ये तणाव निर्माण होत जिहादी जमावाने पोलिसांवर दगडफेक केली. या दगडफेकीमध्ये २१ पोलिस जखमी झाले तर अनेक वाहनांचे मोठे नुकसान झाले आहे. या हिंसाचार प्रकरणी १४०० ते १५०० जणांवर गुन्हा दाखल करण्यात आला आहे.
या हिंसाचार प्रकरणी नाशिक पोलिसांकडून कठोर कारवाई सुरू आहे. जमावाने केलेला हल्ला पूर्वनियोजित असल्याचा पोलिसांचा संशय आहे. जमावाने पोलिसांवर फेकलेले दगड, विटा, टाईल्स तपासणीसाठी फॉरेन्सिक टीमकडे पाठवले आहेत. व्हायरल व्हिडीओ आणि सीसीटीव्हीच्या आधारे नाशिक पोलिसांचा तपास सुरू आहे. पोलिस गुन्हा दाखल केलेल्या सर्व आरोपींचा शोध घेत आहेत. या घटनेनंतर अनेक आरोपी फरार झाले.
आतापर्यंत ५७ संशयित आरोपी निष्पन्न झाले आहेत. तर २५ जणांना नाशिक पोलिसांनी अटक केली. संशयित आरोपींमध्ये एका विधी संघर्षित बालकाचाही समावेश आहे. नाशिक हिंसाचार प्रकरणात कारवाई करण्यात आलेल्या संशयित आरोपींमध्ये काँग्रेसचे हनिफ बशीर, ठाकरेंच्या शिवसेनेचे निलोफर शेख, शरद पवारांच्या राष्ट्रवादीचे अरीफ हाजी पटेल शेखचा देखील समावेश आहे. कट रचणे, अफवा पसरवणे, प्रत्यक्ष - अप्रत्यक्ष हिंसाचार घडविण्यात सहभाग असल्याने या सर्वांविरोधात गुन्हा दाखल करण्यात आला आहे.