२०२६ पर्यंत नक्षलवाद देशातून पूर्णपणे नष्ट करू - अमित शहा

शिर्डी: शिर्डी येथे झालेल्या भाजपच्या अधिवेशनात केंद्रीय गृहमंत्री अमित शाह यांनी विविध महत्त्वाच्या मुद्द्यांवर भाष्य केले. त्यांनी आगामी निवडणुकांसाठी कार्यकर्त्यांना मार्गदर्शन करत मोठे लक्ष्य समोर ठेवले. अमित शाह म्हणाले, "इंडी आघाडीचा गोंधळ सुरू झाला आहे. उद्धव ठाकरे यांची शिवसेना स्वतंत्र निवडणुकीत उतरली आहे. दिल्लीतील एकता फक्त दिखाव्याची आहे. ममता बॅनर्जी आणि लालूप्रसाद यादव एकमेकांवर कुरघोडी करत आहेत. ही घमंडी आघाडी तुटण्यास सुरुवात झाली आहे."

तसेच ते पुढे म्हणाले, की "२०२४ च्या लोकसभा निवडणुकीत महाराष्ट्राने विजयाचा पाया रचला आहे. २०२५ मध्ये दिल्लीतील विधानसभा निवडणुकीत भाजप पुन्हा सत्ता स्थापेल. विजयाची सुरुवात दिल्लीपासून होईल. तसेच ३१ मार्च २०२६ पर्यंत नक्षलवाद देशातून पूर्णपणे नष्ट करू, हे आमचे ठाम आश्वासन आहे," असे मोठे विधान अमित शाह यांनी केले.

"आमच्या निवडणुकीतील यशाचे कारण आमची मजबूत संघटना आहे. भाजपचे प्रत्येक बूथवर किमान २५० सदस्य असले पाहिजेत," असेही आवाहन अमित शहा यांनी कार्यकर्त्यांना केले. शरद पवारांच्या कारकिर्दीत शेतकऱ्यांच्या आत्महत्या वाढल्या. आता, देवेंद्र फडणवीस आणि नरेंद्र मोदी यांच्या नेतृत्वाखाली प्रत्येक शेतकऱ्याच्या शेतात पाणी पोहोचवले जाईल. पुढील निवडणुकीत हा वादा पूर्ण करूनच आम्ही मत मागू," असे त्यांनी सांगितले.

मुंबई, नागपूर, पुणे आणि संभाजीनगरसह अनेक महानगरपालिका आणि नगरनिगम निवडणुका या वर्षात होणार आहेत. "या सर्व निवडणुकांमध्ये भगवा फडकवा," असे त्यांनी आवाहन केले. "रामलल्लांच्या मूर्तीची प्राणप्रतिष्ठा पूर्ण झाली आहे. मोदींनी दिलेला हा वादाही पूर्ण झाला. तसेच, ३७० कलम हटवून आम्ही दहशतवादाची कणा मोडली," असे त्यांनी नमूद केले.

अमित शाह म्हणाले, "पंचायतपासून संसदेपर्यंत एनडीएचा विजय होईल. साईनगरीतून आपण संकल्प करूया की एनडीए प्रत्येक निवडणुकीत विजयी होईल. कधीही कोणालाही आमच्याशी विश्वासघात करण्याची संधी मिळू देणार नाही, अशी मजबूत भाजप आपण निर्माण करूया."