दिल्ली: छोट्या पडद्यावरील रिऍलिटी शो म्हणून बिग बॉस मोठ्या प्रमाणात लोकप्रिय आहे. प्रेक्षक उत्साहाने या शोच्या नव्या सीझनची वाट पाहात असतात. मात्र, या शो मधील कंटेंटवर अनेकदा प्रश्नचिन्ह उपस्थित केले जाते. अश्लीलता, शिवराळ भाषा या कार्यक्रमात प्रामुख्याने आढळते. या कार्यक्रमाच्या याच स्वरूपावरून हा कार्यक्रम बंद करण्याची मागणी होते आहे. भाजपचे खासदार अनिल फिरोजिया यांनी गुरुवारी लोकसभेत ही मागणी केली. छोट्या पडद्यावरील लोकप्रिय रिऍलिटी शो ‘बिग बॉस’वर तात्काळ बंदी घालण्याची मागणी अनिल फिरोजिया यांनी केली आहे. या कार्यक्रमातील अश्लीलता तसेच शिवराळ भाषेचा समाजावर वाईट परिणाम होत असल्याचे फिरोजिया यांचे म्हणणे आहे.
मध्य प्रदेशातील उज्जैन येथून लोकसभा खा. असलेले फिरोजिया यांनी प्रश्नोत्तराच्या तासादरम्यान हा विषय उपस्थित केला. बिग बॉसचे भारतात अनेक प्रेक्षक आहेत. आणि कोट्यवधी प्रेक्षक हा कार्यक्रम पाहात असतात, असेही फिरोजिया यांचे म्हणणे आहे. समाजातील तरुण तसेच मुलांवर या कार्यक्रमाचा वाईट परिणाम होतो. हिंदी बिग बॉसचा सूत्रसंचालक अभिनेता सलमान खान याचे नाव घेऊन हा आणि अशाच प्रकारचे अन्य कार्यक्रम बंद करण्यात यावेत, अशी मागणी आपण करत असल्याचे फिरोजिया यांनी सांगितले.
या कार्यक्रमात सातत्याने शिवराळ भाषेचा वापर होतो तसेच वादविवाद दाखवले जातात. तसेच अनेकदा स्पर्धकांचे वैयक्तिक जीवन अत्यंत वाईट पद्धतीने समोर आणले जाते. अशाप्रकारचा कंटेंट असल्याने समाजावर याचा परिणाम होत असल्याचे ते म्हणाले.