मुंबई: ‘व्‍हॉट्‍सअ‍ॅप’वरील ‘मेटा एआय’ या अ‍ॅपवरून हिंदूंच्‍या देवतांचे विडंबन करणारे विनोद प्रसारित करण्‍यात आले. हे ‘अ‍ॅप’ प्रसारित करणार्‍या गुरुग्राम हरियाणा येथील ‘मेटा प्‍लॅटफॉर्म आय प्रायव्‍हेट लिमिटेड’ आस्‍थापनाला मुंबईतील हिंदुत्‍वनिष्‍ठ नागरिक गौतम तिवारी यांनी ‘या अ‍ॅपवरून असे विनोद काढून टाकावेत, तसेच हिंदू धर्मियांची क्षमा मागावी’, अशा आशयाची कायदेशीर नोटीस अधिवक्‍त्‍यांद्वारे बजावली आहे. ‘तसे न केल्‍यास कायदेशीर कारवाई केली जाईल’, अशी चेतावणीही त्‍यांनी दिली आहे.
कायदेशीर नोटिसीमध्‍ये तिवारी यांचे अधिवक्‍ता प्रकाश साळसिंगीकर यांनी म्‍हटले आहे, ‘‘माझे अशील गौतम तिवारी हे कायद्याचे विद्यार्थी असून यांना ‘मेटा एआय अ‍ॅप’च्‍या अपटेडविषयी ३ जुलै २०२४ या दिवशी त्‍यांच्‍या मित्राकडून माहिती मिळाली. जगातील १९३ देशांपैकी १८० देशांमधील लोक हे ‘अ‍ॅप’ वापरत असल्‍याने त्‍यावरून प्रसारित केल्‍या जाणार्‍या माहितीचा पुष्‍कळ मोठ्या प्रमाणात परिणाम होत आहे. याचा लोकांचे वैयक्‍तिक जीवन आणि व्‍यवसाय यांवर परिणाम होत असतो. ‘मेटा एआय अ‍ॅप’द्वारे आपण विचारलेल्‍या माहितीला उत्तर दिले जाते.