તાજેતરમાં વલસાડ જિલ્લામાં પોલીસની એક ઉત્તમ કામગીરી સામે આવી છે. તમને જણાવી દઇએ કે છેલ્લા 16 વર્ષથી લાપતા બાળકો સહિત પુખ્ત વ્યકિતઓને શોધી પરિવાર સાથે મિલાપ કરવા માટે વલસાડ પોલીસ જાણીતી છે. આ ખાસ અભિયાન ‘MILAAP- Mission For Identifying & Locating Absent Adolescents & Persons’ અંતર્ગત વલસાડ પોલીસ દ્વારા ૧૦ મહિનામાં ૪૦૦ વ્યક્તિઓને શોધી કાઢી તેમના પરિવાર સાથે મિલાપ કરાવી આ તમામ ઘરોમાં સ્મિતને પુન:જીવીત કર્યુ છે.
ગુમ કે અપહરણ થયેલા વલસાડ જિલ્લાના નાગરીકો પૈકી મળી આવેલ 400 વ્યક્તિઓમાં 76 સગીરા અમે 36 બાળકો મળી 18 વર્ષથી નાના 112 બાળકોનો સમાવેશ થાય છે. ગૃહ રાજ્ય મંત્રી હર્ષ સંઘવીએ વલસાડ પોલીસે લાપતા કે અપહરણ થયેલા વ્યક્તિને શોઘી કાઢવામાં શરુ કરેલા અભિયાનની પ્રસંશા કરી હતી.
આ ઉપરાંત રાજ્ય પોલીસ વડા વિકાસ સહાયની સુચનાથી વલસાડ જિલ્લા પોલીસ અધિક્ષક ડૉ. કરણરાજ વાઘેલાના માર્ગર્શન હેઠળ જાન્યુઆરી-2024 થી શરુ કરવામાં આવેલા આ મિશન મિશન મિલાપ અંતર્ગત વલસાડ જિલ્લા એમ.ઓ.બી શાખા દ્વારા ૧૬ વર્ષથી ગુમ કે અપહરણ થયેલા બાળકો-વ્યક્તિઓની યાદી તૈયાર કરવામાં આવી હતી. ત્યાર બાદ જે તે સમયની તમામ જુની ફાઇલો ઓપન કરી સંલગ્ન પોલીસ મથકના અમલદારો સાથે કેસની ચર્ચા કરીને શોધખોળ માટે સંવેદના સાથે કામગીરી શરુ કરી.
આ અભિયાનમાં જાન્યુઆરીથી ઓક્ટોબર 2024 સુધી 10 માસ દરમિયાન ટુંકા ગાળામાં ગુમ થયેલા કુલ 112 બાળકો સહિત 182 મહિલા, 106 પુરુષ તેમજ 288 પુખ્ત વ્યક્તિઓને મળીને કુલ 400 લોકોને શોધી કાઢવામાં વલસાડ પોલીસને સફળતા મળી છે.