कोल्हापूर: विशाळगडावरील उरूस काळात कुर्बानी करण्यास मुंबई उच्च न्यायालयाने परवानगी दिली असतांनाही पोलिस व महसूल प्रशासनाने गडावर येणाऱ्या भाविकांना कुर्बानी करण्यास मनाई केली. यामुळे येथील दर्गा ट्रस्टी व ग्रामस्थांनी आज बकरी ईद सण साजरा न करता गडावरील सर्व व्यवहार बंद ठेवून प्रशासनाचा निषेध केला.
पुरातत्व व वस्तुसंग्रहालय उपसंचालकांनी किल्ले विशाळगडच्या संरक्षित क्षेत्रातील पशुबळी प्रथेवर दीड वर्षांपूर्वी बंदी घातली होती. त्या विरोधात येथील मलिक रेहान दर्गा ट्रस्टींनी उच्च न्यायालयात याचिका दाखल केली होती. त्यानुसार बी. पी. कुलाबावाला व न्यायमूर्ती एफ. पी. पुनावाला यांच्या खंडपीठाने १७ ते २१ जून या पाच दिवसांसाठी कुर्बानी करण्यास परवानगी दिली होती. गडावर रविवारपासून ईद व उरुसाची जय्यत तयारी केली होती. मात्र, तहसीलदार रामलिंग चव्हाण, पोलिस उपअधीक्षक आप्पासाहेब पाटील यांनी गडावर कुर्बानी करण्यास जाणाऱ्या भाविकांना पायथ्याशीच अडविले.
दर्गा ट्रस्टी व याचिकाकर्त्यांनी न्यायालयाने कुर्बानीस परवानगी दिल्याचे सांगूनही प्रशासनाने भाविकांना कुर्बानीस विरोध केला. यामुळे ट्रस्टचे सदस्य व ग्रामस्थांनी दर्ग्यासमोरील चौकात एकत्रित येऊन प्रशासनाच्या अन्यायी निर्णयाचा निषेध केला व ईद सण साजरा न करण्याचा निर्णय घेतला.