*नंदुरबार: वीज कोसळल्याने शेतमजुराचा जागीच मृत्यू*

 नंदुरबार- जिल्ह्यात विजांच्या कडकडाटासह तुरळक पावसाने हजेरी लावली. परंतु याच दरम्यान वीज पडून एका तरुणाचा मृत्यू झाला. नंदुरबार तालुक्यातील शनिमांडळ येथे ही घटना घडली.
अधिक वृत्त असे की, नंदुरबार जिल्हयात 14 आणि 15 एप्रिल  असे दोन दिवस वादळीवाऱ्यासह पाऊस होईल, असा इशारा हवामान खात्याने दिला होता. त्यानुसार आज अचानक ढगाळ वातावरण बनले. वीजांच्या कडाकडाटासह आणि ढगांच्या गडगडाटासह जिल्हयातील काही भागात तुरळक पाऊस झाला. दुपारी १२ वाजेच्या सुमारास नंदुरबार तालुक्याच्या पूर्वपट्टयात वीजांचा कडकडाट तीव्र स्वरूपात झाला. त्याप्रसंगी तालुक्यातील शनिमांडळ-रजाळे फाटयावर राजू भरवाड यांच्या शेतात शनिमांडळ, तिलाली येथील रविंद्र रामदास गिर (३२) हा मजूरी करीत होता. त्याच्या अंगावर वीज कोसळली व त्याचा जागीच मृत्यू झाला, असे प्रत्यक्षदर्शींचे म्हणणे आहे. घटना घडताच शनिमांडळ, तिलाली, रजाळे परिसरातील ग्रामस्थांनी घटनास्थळी धाव घेतली. नंदुरबार तालुका पोलीस ठाण्यात अकस्मात मृत्यूची नोंद करण्यात आली.