छत्रपती संभाजीनगर: औरंगजेबाच्या कबरीवरून नागपूरमध्ये दंगल झाली. मुख्यमंत्री देवेंद्र फडणवीस यांनी कायद्याने कबरीला संरक्षण असल्याने ती हटवता येणार नसल्याचे सांगितले. तसेच कबरीचे उदात्तीकरण होऊ देणार नसल्याचेही ठणकावले. आता ज्या खुलताबादमध्ये औरंगजेबाची कबर आहे त्या खुलताबादचे नाव बदलू, अशी घोषणा मंत्री संजय शिरसाट यांनी केली आहे. केवळ भाजप, शिवसेना नव्हे तर स्थानिक जनता यासाठी आग्रही आहे.
औरंगजेबाची कबर असलेले खुलताबादचे नाव रत्नापूर होते. औरंगजेबाने ते बदलून खुलताबाद केले. देवगिरीचे नाव बदलून दौलताबाद केले. खुलताबादचे नामांतर होणार असून दौलताबादचेदेखील नामांतर होणार आहे. संभाजीनगरचे नाव खडकी होते. कालांतराने त्याचे नाव औरंगाबाद झाले. तसे खुलताबादचे नाव रत्नापूर होते. कालांतराने ते खुलताबाद झाले. औरंगजेबाने त्याच्या काळात जे काही कारनामे केले आहेत त्यामुळे अनेक शहरांची नावे बदलली. धाराशिवचे नाव बदलले गेले. नगरचे नाव बदलले गेले. हे सगळे ‘बाद’ ‘बाद’ आहे ना त्यांची नावे बदलण्याची प्रोसेस आम्ही करत आहोत, असेही मंत्री संजय शिरसाट म्हणाले.
संजय शिरसाट म्हणाले, की औरंगजेबाची कबर आहे तेथे मराठ्यांचे शौर्याचे प्रतीक असलेले छत्रपती संभाजी महाराजांचे, छत्रपती शिवाजी महारांजे स्मारक उभारण्यासाठी निवेदने येत आहेत. शिवाजी महाराजांचे आणि संभाजी महाराजांचे स्मारक या ठिकाणी बांधण्यात येईल. औरंगजेबाने नामांतर केलेल्या सगळ्या गावांची नावे बदलणार आहोत, असा निर्धार देखील शिरसाट यांनी बोलून दाखवला.