गडचिरोली: गडचिरोली जिल्ह्यात माओवाद्यांसोबत झालेल्या चकमकीत गडचिरोली पोलीस दलातील विशेष अभियान पथकाचे पोलीस अंमलदार महेश कवडू नागुलवार (वय - ३८ वर्षे, रा. अनकोडा, ता. चामोर्शी, जि. गडचिरोली) गंभीर जखमी झाले. घटनास्थळी लढा देत असतांना त्यांना गोळ्या लागल्या, त्यामुळे त्यांची प्रकृती गंभीर झाली. पोलीस दलाने तत्काळ त्यांना हेलिकॉप्टरच्या मदतीने बाहेर काढून गडचिरोलीच्या सामान्य रुग्णालयात दाखल केले. मात्र, वैद्यकीय उपचार सुरू असतानाच त्यांनी वीरमरण स्वीकारले. त्यांच्या शौर्यपूर्ण बलिदानामुळे संपूर्ण जिल्ह्यात शोककळा पसरली आहे.
हुतात्मा पोलीस अंमलदार महेश नागुलवार यांच्या पार्थिवावर काल दि. १२ रोजी त्यांच्या मूळगावी मौजा अनकोडा, ता. चामोर्शी, जि. गडचिरोली येथे शासकीय इतमामात अंत्यसंस्कार केले करण्यात आले. या अंत्ययात्रेत गडचिरोली पोलीस दलाचे वरिष्ठ अधिकारी, जिल्हा प्रशासनाचे प्रतिनिधी तसेच असंख्य नागरिक सहभागी झाले होते.
गडचिरोली जिल्ह्यातील माओवादी चळवळीविरुद्ध लढणाऱ्या पोलिस दलाने अनेक वर्षांपासून कठोर संघर्ष केला आहे. या चकमकीत नागुलवार यांनी दाखवलेले शौर्य आणि त्याग प्रेरणादायी आहे. त्यांच्या बलिदानाला संपूर्ण महाराष्ट्र सलाम करतो.