कराड: राज्यात आताचं विधानसभा निवडणुकीचा महासंग्राम संपला आहे. राज्यामध्ये महायुतीला जनतेने कौल दिला आहे. अशातच आज दिवंगत नेते यशवंतराव चव्हाण यांची पुण्यतिथी आहे. यशवंतराव चव्हाण यांच्या समाधीचे दर्शन घेण्यासाठी राष्ट्रवादी काँग्रेसच्या दोन्ही गटातील नेते कराडला पोहोचले आहे. त्यावेळी अजित पवार यांची भेट त्यांची रोहित पवार यांच्यासोबत झाली. अजित पवारांनी मिश्किल शब्दांत पुतण्या रोहित पवार यांना खोचक टोला मारला आहे. अजितदादांनी रोहित पवारांना थेट काकांचे दर्शन घेण्याचा आदेश दिला. या भेटीचा व्हिडिओ सध्या चर्चेत आहे.
'माझी सभा झाली असती तर काय झालं असतं...?' असा टोला अजित पवारांनी रोहित पवारांना मारला आहे. तसंच, दर्शन घे काकाचं असं म्हणताच काकाच्या पाया पडत अर्थात अजित पवार यांच्यापुढं नतमस्तक होत रोहित पवारांनी वरिष्ठांचा आशीर्वाद घेतला. पण, 'थोडक्यात वाचला...' असं म्हणत यावेळी अजित पवारांनी रोहित पवारांना खोचक टोलाही लगावल्याचं पाहायला मिळालं.