ગુજરાતમાં અવાર-નવાર પબ્લીક પ્લેસને બોમ્બથી ઉડાવી દેવાની ધમકી મળતી રહે છે, તેવામાં ફરી એક વાર શૌક્ષણિક સંસ્થાઓને બોમ્બથી ઉડાવી દેવાની ધમકી મળી છે. ગુજરાતના પાટનગર એવા ગાંધીનગરમાં આવેલ બે યુનિવર્સિટીને બોમ્બથી ઉડાવી દેવાની ધમકી મળી છે. ધમકી મળતા જ આસપાસના વિસ્તારમાં ભયનો માહોલ સર્જાયો છે. ગાંધીનગરમાં GNLU અને PDEU યુનિવર્સિટીને બોમ્બથી ઉડાવી દેવાની ધમકી મળી છે. આ બન્ને યુનિવર્સિટીને બોમ્બ મુકાયાનો ઇ-મેઇલ મળ્યો હતો. ત્યાર બાદ પોલીસ દ્વારા ચર્સ ઓપરેશન હાથ ધરવામાં આવ્યું છે.
ગાંધીનગરની બે યુનિવર્સિટીને બોમ્બથી ઉડાવી દેવાની ધમકી મળતા પોલીસ તંત્ર દોડતુ થઈ ગયુ હતુ. તાત્કાલિક ધોરણે બોમ્બ સ્કવોર્ડ સહિતની ટીમે સ્થળ પર પહોંચીને તપાસ શરુ કરી હતી. બોમ્બ સ્કવોર્ડની ટીમને સાથે રાખીને પોલીસે બન્ને શૈક્ષણિક સંસ્થાઓ અને આસપાસના વિસ્તારમાં તપાસ કરી હતી. આ સમગ્ર ઘટના અંગે ઈન્ફોસિટી પોલીસમાં ફરિયાદ નોંધી ગુનો દાખલ કરાયો છે.
ઉલ્લેખનીય છે કે આ પહેલા અમદાવાદ એરપોર્ટ અને રાજકોટ બસ પોર્ટને પણ અવાર નવાર ઇ-મેઇલ મારફતે બોમ્બથી ઉડાવી દેવાની ધમકી મળી હતી.